Norsk Målungdom slår eit slag for at fleire bedrifter skal marknadsføre seg på nynorsk.
– Denne fråsegna er ei klar melding til alle verksemder i nynorske kjerneområde, med oppmoding om å bruka nynorsk i marknadsføringa, seier påtroppande nestleiar i Norsk Målungdom, Kristofer Olai Ravn Stavseng til Sogn Avis.
Han meiner det er fleire grunnar til å bruke nynorsk.
– For det fyrste syner ein ei sterk forankring til staden føretaket kjem ifrå, for det andre er det positivt for omdømet når eit firma syner språkleg medvit, og for det tredje gir nynorsken eit særpreg bokmålet ikkje kan tilby. Me lever i ei verd der individuell valfridom og det å vere unik står sterkt. Difor vil nynorskverksemder ha eit klart konkurransefortrinn. Som tidlegare direktør Eivind Grov på Hotell Alexandra i Loen, vinnar av nynorsk næringslivspris, ein gong så optimistisk slo fast: «Det er berre å bestemme seg for å nytte nynorsk!»
