Skogstad Sport i Innvik vil ikkje lenger bruke bokmål til å marknadsføre produkta sine. No går dei for nynorsk.
– Vi er stolte av alt vi gjer. Røtene våre og historia vår er viktig. Og ikkje noko er meir naturleg for oss enn nynorsk, seier sals- og marknadssjef Knut Roger Nesdal til Sunnmørsposten, når bedrifta no etter 70 år legg om frå bokmål til nynorsk. Språkbytet vil vise att i katalogar, på nett og i all kommunikasjon med kundane, fortel han til avisa.
Nesdal seier språket er eit kvalitetsstempel og viser til at nynorsk er det vanlegaste målet i Stryn kor butikken har basen sin. Den første katalogen på nynorsk er no ute, og sportsbutikken har så langt berre fått positive reaksjonar på målbytet.
