Danskane slit med å forstå sine nordiske naboar. No meiner det danske språkrådet at danske born bør lære norsk og svensk i skulen.
Ei norsk undersøking viser nemleg at danskane har vanskar med å forstå munnleg norsk og svensk, skriv NRK.
– Eg kunne godt tenkje meg at det vart meir av nordiske språk i skulen, og at det vart introdusert på eit tidlegare klassetrinn, seier direktør i Dansk Sprognævn, Sabine Kirchmeier-Andersen til Fyens Stiftstidende.
Les også: Reagerer på dubbing av nordisk barne-tv.
– Når ein lærer eit nordisk språk så får ein kompetanse til å lære andre framandspråk også, seier ho.
Men det er ikkje berre danskane som slit med oss. Nordmenn og svenskar slit også med å forstå munnleg dansk.
– Nordmenn er flinkare enn danskane og svenskane til å forstå fordi me er vande med språkvariasjon og dialektar, men det er ikkje problemfritt her heller, seier professor i nordisk språk ved Universitetet i Oslo, Jan Terje Faarlund. (©NPK)
