Når Posten no legg ned 149 postkontor, blir det i dei fleste fylka berre eitt postkontor att.
Dei 149 postkontora skal i staden bli Post i Butikk, og etter denne omlegginga vil Posten bestå av 30 postkontor og 1 400 Post i Butikk. Omlegginga byrjar i år og vil vere sluttført i 2014.
Det er færre som sender fysiske brev, medan pakkevoluma veks som følgje av auka netthandel. Folk flest har tatt i bruk nettbank, og bruken av manuelle banktenester på postkontora har gått ned meir enn 90 prosent dei siste 20 åra. Det er først og fremst bedriftskundane som har behov dei treng å få utført på eit postkontor. Denne utviklinga har ført til at færre besøker postkontora, seier Posten i ei pressemelding. Dei siste 10 åra har over 700 postkontor blitt lagt om til Post i Butikk.
– Endra kundebehov gjer at Posten må tilpasse seg. Post i Butikk gir eit tenestetilbod som er godt tilpassa kundane sine behov for lange opningstider, seier konsernsjef Dag Mejdell i Posten Norge.
Omlegginga vil påverke om lag 1000 tilsette ved postkontora.
