Nynorskkommunen Fjell reagerer no på at over 80 prosent av alle skriv frå staten kjem på bokmål, skriv Vestnytt.
Språkrådet gjennomfører no ei kartlegging i nynorskkommunane der ein blant anna stiller spørsmål om skriv frå statsorgan er skrivne på nynorsk.
– Der er me nøydde til å svara sjeldan eller aldri, sjølv om Fjell skulle hatt samtlege brev på nynorsk, seier informasjonsrådgjevar Vigleik Brekke i Fjell kommune til Vestnytt.
Kommunen har no kartlagt målforma i statlege skriv til kommunen gjennom to periodar i 2010, og reagerer sterkt på resultatet.
– Resultatet er sjokkerande. Me har no skrive brev til Kulturdepartementet og ber dei sørga for at samtlege statsorgan følgjer lova, seier rådmann Steinar Nesse.
Av 92 skriv til Fjell frå statlege organ i desse to periodane er 81 prosent på bokmål og 19 prosent på nynorsk.
