Heim Nyhende Lomheim ikkje overraska over tom direktørstol

Lomheim ikkje overraska over tom direktørstol

For snart eitt år sidan vart stillinga som språkdirektør utlyst. Jobben er framleis ledig. – Ikkje overraskande, seier eksdirektør Sylfest Lomheim.

 

Etter fleire rundar med intervju, råd frå styret i Språkrådet og bruk av hovudjegerfirma er kulturminister Anniken Huitfeldt like langt. Verken retorikkprofessor Kjell Lars Berge eller andre er funne verdige som etterfølgjaren til Lomheim. Ikkje så merkeleg, meiner han sjølv.

 – Det er ei krevjande stilling. Ingen åtte til fire-jobb. Du har verkeleg totalansvar for det som skjer: menneskeleg, politisk, økonomisk, administrativt og sjølvsagt fagleg, seier Lomheim til NTB.

Måtte lande
Då språkdirektøren omsider gjekk av 1. september – etter fleire utsettingar – trengde han litt tid for å lande. Han tok eit par turar til Frankrike for «å få direktøren ut av magen». Flytta tilbake til Kristiansand frå Oslo. Ved Universitetet i Agder har han 60 prosent stilling som professor i norsk.

– Eg har hatt nok leiarjobbar no, seier Lomheim, som likevel stadig er på farten. I desember måtte han tre inn som fungerande leiar i Kringkastingsrådet, midt under debatten om NRK 3-programmet Trekant.

Følgjer med
Og sjølvsagt følgjer han lagnaden til Språkrådet vidare. Han håpar på ei snarleg løysing på direktørproblemet.

– Det finst ikkje flust med folk som har så brei erfaring som trengst. For eksempel er det ein fordel å ha innsikt i korleis det politiske livet fungerer for ein som skal vere ein aktør i det kulturpolitiske landskapet, understrekar han. Han har ikkje kontakta kulturministeren for å seie si meining om saka, sjølv om han har fleire kandidatar i tankane.

– Men om ho ber om råd, skal ho få det, seier han.

Språkåret
Som direktør hadde Sylfest Lomheim for vane å kaste eit blikk på året som gjekk når det nærma seg nyttår. I 2010 var det fleire nye og nokre nesten nye ord som stikk seg opp av den jamne massen, for eksempel «askefast» og andre askerelaterte uttrykk. Han noterte seg også Oddbjørn Hjelmeseth som klaga over at han fekk «mykje is i røbben».

– I moderne språkhistorie er det enkelt å både tidfeste og personfeste nye ord, det er ikkje som i gamle dagar når det meste vart gjetting, seier Lomheim.

Han dreg også fram monstermastene i Hardanger som eit 2010-ord som vil bli hugsa, medan eit visst furubord kanskje fortare går i gløymeboka.

– Furubord var eit skjellsord som Ari Behn brukte om forfattarkollega Erlend Loe, eigentleg ganske artig, smiler Lomheim.

Framsnakking
Aller mest glad blir han av å tenkje på «framsnakking», som har gjeve opphav til ei fjesbokgruppe med nesten 150.000 tilhengarar. Harstad Tidende har fått ei eiga spalte som heiter Framsnakking – der nokon snakkar pent om andre.

Lomheim er ikkje kjent som teknofrik, men dette har han fått med seg.

– Ordet kjem frå Nordland og fekk eit skikkeleg oppsving etter at kronprins Haakon brukte det. Det blir kanskje ikkje brukt så mykje i daglegtale, men det er eit positivt omgrep som kan få stor verknad for mange, seier Lomheim. (NPK)

NYNORSK INSPIRASJON

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

MEST LESE

Ny lærebok vil vise at nynorskopplæring er moderne

Lærarstudentar og norsklærarar som strevar med nynorsk får gjennom ei ny bok høve til å styrkje nynorskkompetansen sin. – Boka er sett saman av ulike...

Vel nynorsk for barnet ditt!

Er du ein av dei mange tusen føresette som veit at dette er siste året i barnehage, og neste haust er det skulestart? Kanskje...

Det nynorske næringslivet foreinar kreftene

Den nye medlemsorganisasjonen Nynorsk bedriftsforum skal vere eit landsdekkande nettverk av og for nynorskbedrifter. Målet er å betre dei språklege arbeidsvilkåra for nynorskbedriftene, slik...

Unikt Aasen-materiale publisert på nett

Boksamlinga etter Ivar Aasen inneheld omlag 2 500 bøker. I januar i år tok Nynorsk kultursentrum til på arbeidet med å gå gjennom alle...