Tysdag blei kulturrådet, bibliotekforeininga, forleggjarforeininga, forleggjarsambandet og forfattarforeininga samde om at e-bøker skal inkluderast i kulturrådets innkjøpsordning for litteratur.
– Vi er samde i prinsippet om at e-bøker skal inkluderast i innkjøpsordninga, men det gjenstår litt finpussing av ordlyden, fortel Mari Finess, som er seksjonsleiar for litteratur i Norsk kulturråd, til lnk.no.
Kvart år sidan 1965 har kulturrådet kjøpt inn 1000 eksemplar av dei fleste nye, norske, skjønnlitterære bøkene for vaksne. Desse eksemplara blir fordelte på 970 bibliotek i landet.
– Vi har 30 eksemplar av kvar einskild bok, som vi ikkje har aktive mottakarar på. Desse eksemplara konverterer vi nå frå papir til e-bøker for 2012, opplyser seksjonsleiaren for litteratur.
Aktuelle mottakarar av desse e-bøkene blir bibliotek som låner ut e-bøker. Buskerud fylkesbibliotek, ved dei tre biblioteka i Drammen, Kongsberg og Nore og Uvdal, er aktuelle mottakarar, det same er det planlagde Ryfylkebiblioteket, som er eit samarbeid mellom seks Ryfylke-kommunar om eit e-bibliotek.
Les meir om e-bøker, utlån av desse og innkjøpsordninga i LNK-avisa som kjem ut i slutten av oktober.
