Festivalleiar Roald Kaldestad meiner sponsorstøtta betyr at ein kan få gjennomført den festivalen ein drøymer om, også i 2012.
– Det er ei fjør i hatten for festivalen, seier han og legg vekt på at barnebokfestivalen har eit behov for å bli meir synlege.
– Bakgrunnen for festivalen er å løfte fram den nynorske barnelitteraturen. I år vil me også formidle den på nye måtar, både med å blande litteratur og fotball, samt å arrangere låtskrivarkonkurranse, seier han og viser til at den nynorske barnelitteraturen har fostra mange store forfattarar som Einar Økland, Hans Sande, Rune Belsvik, og at tilveksten er god med forfattarar som Maria Parr og Terje Torkildsen.
Ragnar Hovland blir årets festivalforfattar. Under festivalen er det opne førestillingar for born og vaksne, forfattarbesøk i skulen, barnelitteraturseminar, skrivekurs, konsertar, førestillingar og utstillingar.
Siren Sundland i Sparebanken Vest er imponert over programmet under festivalen og meiner Falturiltu er ein viktig arena for nynorsk barnelitteratur, men også for bygging av vestnorsk identitet og som aktør i samfunnsutviklinga.
– Me håpar pengane våre kan bidra til at ein kan gjennomføre den festivalen ein har planlagt, i tillegg håpar me å bidra med eit nettverk festivalen kan dra nytte av seier Sundland, og viser til at Sparebanken Vest blant anna er innvolverte i Litteraturhuset i Bergen og i litteratursymposiet i Odda.
