Sosialistisk Venstreparti har bestemt seg for at partiet vil jobbe for å senke stemmerettsalderen til 16 år.
– SV vil senke stemmerettsalderen både for stortingsval og lokalval til 16 år, seier stortingsrepresentant Snorre Valen til Dagsavisen.
Han vil no fremje grunnlovsforslag om å endre stemmerettsalderen, men forslaget vil ikkje bli vedteke. Valen treng to tredels fleirtal og vedtak frå to Storting for å få gjennom forslaget. Førebels er det berre Venstre som støttar forslaget. Partileiar Trine Skei Grande uttalte under ein stortingsdebatt om temaet i 2010 at «ungdom som må betale skatt og kan fengslas, bør også få mulegheit til å påverke politikken».
Arbeidarpartiet har ikkje bestemt seg om dei vil endre aldersgrensa. Stortingsrepresentant Håkon Haugli (Ap) i kommunal- og forvaltningskomiteen meiner det er argument både for og imot. Kommunal- og regionalminister og Sp-leiar Liv Signe Navarsete vil ikkje ta endeleg standpunkt før evalueringa av forsøket ved lokalvalet i 2011 er klart neste år.
Kristeleg Folkeparti, Høgre og Framstegspartiet meiner stemmeretten skal følgje myndig alder. (©NPK)
