Fjelldansen er namnet på eit eige kompetansesenter for dans som i desse dagar blir lansert i Valdres.
– Fjelldansen skal laga aktivitetar gjennom heile året. Det er kurs, seminar og arbeidsverkstader som har som mål å driva med kompetanseheving blant halvprofesjonelle og profesjonelle dansarar, seier kunstnarisk leiar i dansekompaniet Frikar, Hallgrim Hansegård til NRK.
Tiltaket er eit samarbeid mellom Frikar, Ål kulturhus og Teater Innlandet. I tillegg har Frikar fått 419.000 kroner frå Norsk kulturråd og 50.000 kroner frå Valdres natur- og kulturpark som dei brukar til å starta kompetansesenteret. Men det er langt frå nok til å gjera om lokala Frikar har i Aurdal i dag, som opphavleg er ein gammal skule, til eit kompetansesenter.
– For å få til alt vi ønskjer med bygget, må vi nok investera mellom tre og fire millionar, seier Hansegård. Han håpar at Valdres og Hallingdal med det nye kompetansesenteret kan bli ein viktig region for dans. (©NPK)
