Meir synlege bibliotek er truleg hovudårsaka til fleire nøgde brukarar ifølgje leiar i Norsk Bibliotekforening, Ingeborg Rygh Hjorten.
Meir enn halvparten som er spurde i ei ny underøking utført av Sentio for Nationen, seier dei er godt nøgde med bibliotektilbodet der dei bur skriv Nationen. 25 prosent gir biblioteka toppkarakter, medan berre to prosent svarar at dei ikkje er nøgde der dei bur i det heile.
Hjorten meiner kulturutgreiinga til Anne Enger Lahnstein, der ho peika på biblioteka som ein viktig del av den kulturelle grunnmuren i Noreg, samstundes som biblioteka har vore systematisk nedprioritert og underfinansiert, har gjort at folk har fått opp auga for at biblioteka har vore sveltefora.
Kulturpolitisk talsmann i Høgre, Olemic Thommesen, seier til Nationen at han ikkje er overraska over tala. Ifølgje Thommesen er det mange gode bibliotek og bibliotekarar rundt om i landet, og eit grunnleggjande medvit om at biblioteka er viktige.
Ifølgje Thommesen handlar det om å innta ei rolle som aktiv kultur- og debattarena lokalt. For mange grender vert biblioteka den naturlege arenaen for kulturaktiviteter, som ikkje krev ei stor scene.
Dei mest nøgde brukarane finn ein på Sørlandet og i Telemark, syner undersøkinga. Generelt er folk i distrikta meir nøgde med bibliotektilbodet der dei bur enn folk i byane.
