Lærarstudentane Amalie Pauline Steindal Johansen og Maria Moen Jakobsen fekk ei fin oppleving med å bruka Framtida Junior i undervisinga på ungdomsskulen.
Lærarutdanninga på Nord universitetet i Bodø har no i vinter hatt eit prosjekt der dei har brukt Framtida junior i to klassar på ungdomsskulen for å jobba med språkhaldningar og haldningar meir generelt. Prosjektet var eit tverrfagleg samarbeid mellom faga norsk og KRLE.
– Me brukte den utgåva av avisa som hadde språk som tema fordi det passa godt til prosjektet vårt om språkhaldningar, fortel faglærarane Kåre Sigvald Fuglseth (KRLE) og Irene Løstegaard Olsen (norsk).
– I klasserommet starta me med ein påstandsleik knytta til ulike aspekt ved språk, både munnleg og skriftleg. Elevane sine meningar om dette var ganske forskjellige, men når det kom til dialekt, var alle einige om at standard austlandsk ikkje var finare enn nordnorsk, fortel Maria Moen Jakobsen. Ho og medstudent Amalie Pauline Steindal Johansen er fjerdeårsstudentar på lærarutdanninga i Bodø.
I påstandsleiken måtte elevane flytta seg i klasserommet alt etter kva dei meinte.
– På den måten blei elevane tvungne til å ta eit standpunkt, og då blei det meir deira eigne standpunkt enn om me berre hadde handsopprekking, seier ho.
På jakt etter språkhaldningar
Etter påstandsleiken fekk elevane leite gjennom avisa etter uttrykk for språkhaldningar, og dei fekk velja ulike uttrykksmåtar som skodespel og teikneserie til å uttrykka desse..
– Elevane var kjempenøgd med opplegget. Det var kjempeartig, seier Maria Moen Jakobsen. Elevane hennar var i ein niandeklasse.
– Ein av elevane sa at det var mykje meir morosamt enn å halda på med fag. Då sa eg at dei hadde jobba mykje med fag, med både lesing og diskusjon og jobbing.
– Kosa seg med avisa!
Amalie Pauline Steindal Johansen var saman med ein åttandeklasse.
– Mange av elevane mine valde å laga ein sketsj om språkhaldningar. Eg fekk ei veldig god oppleving av å ha nynorsk i undervisinga, og lærte mykje om språkhaldningar.
– Eg fekk inntrykk av at elevane likte Framtida Junior veldig godt! Dei kosa seg med avisa, og fekk lesa det dei ville. Når dei får ein slik fridom, så får dei lesa det dei synest er interessant. Fleire av elevane ville gjerne ha lenger tid på seg til å lesa.
Elevane deira har nynorsk som sidemål.
– Elevane ensa nesten ikkje at det var nynorsk dei heldt på med. Di meir ein møter nynorsk, og di meir ein beherskar det, di meir likar ein det, understrekar Amalie Pauline Steindal Johansen
