Helse Midt-Noreg går av med sigeren med mest fornøgde pasientar, medan Helse vest kjem dårlegast ut, viser ei landsomfattande undersøking.
Undersøkinga for 2013 er gjennomført av Kunnskapssenteret på oppdrag frå Helsedirektoratet, skriv Dagens Medisin.
Pasientar har gitt poeng på ein skala frå 1 til 100 på ti indikatorar: Informasjon, legane, ventetid, organisering, pleiepersonalet, pårørande, standard, utskriving, samhandling, og pasienttryggleik.
Helse vest kjem dårlegast ut i undersøkinga på alle område unntatt eitt – pasienttryggleik. På dei andre ni områda ligg Helse vest under landsgjennomsnittet.
Helse Midt-Noreg skårar poeng over landsgjennomsnittet på åtte av ti område. Her er det ventetida pasientane er minst nøgde med, medan vurderinga av dugleiken til legane er på nivå med gjennomsnittet på landsbasis.
Samla sett svarer pasientane over heile landet i fjor at dei hadde best erfaringar med pasienttryggleik, ivaretaking av pårørande, med pleiepersonellet og med legane. Pasientane sin tillit til legane auka litt frå 2012 til 2013.
Den lågaste poengsummen gjeld kor godt pasientane blir førebudde på tida etter utskriving. Denne indikatoren får 56 poeng, som er det same som i 2011 og 2012.
Vidare er ventetid, organisering av arbeidet til sjukehuset og samhandling mellom sjukehus og fastlege eller kommunal helseteneste blant dei områda som får lågast poengsum. (©NPK)
