Trass i auka nynorsktilfang i NRK, er Kringkastingsringen uroa over at det er relativt lite nynorsk i barnekanalen NRK Super.
NRK Super hadde 13 prosent nynorsk i sine sendingar i fjor. Sidan kanalen er så pass ny, finst det ikkje tal å samanlikne med. Kringkastingsringen meiner det er urovekkjande at ikkje kanalen har meir nynorsk.
– Det er avgjerande viktig at born møter nynorsken og dialektar frå heile landet. Dei tidlege opplevingane av språk i media er ikkje berre viktig for å skape språkleg sjølvtillit hos born, men skapar òg eit inntrykk som fester seg av kva som er «normalt» språk. 13 prosent er rett og slett ikkje bra nok, og det er særleg skuffande at dette skjer når vi har samarbeidd tett med NRK for å betre situasjonen. Dette må vi ta opp med NRK, seier Martin Toft, leiar i Kringkastingsringen.
Ifølgje allmennkringkastingsrapporten, som vart lagt fram 8. april, har nynorskdelen auka frå 18 til 24 prosent i NRK1 , 22 til 26 prosent i NRK P1, 21 til 23 prosent i NRK P2 og 23 til 24 prosent i NRK P3. NRK 2 hadde 17 prosent nynorsk i 2009, same som året før.
