Rekordmange lesarar og meir journalistikk som blir lagt merke til.
I løpet av heile 2015 har over 390.000 unike brukarar vore innom den nynorske nyhende- og debattavisa for unge. Det er ein auke på 54.000 samanlikna med i 2014 – og ny rekord. I snitt var 10.800 brukarar innom Framtida.no kvar veke i 2015.
I løpet av året har Framtida.no hatt ein redaksjon tilsvarande knapt 3 årsverk, med kontor på Stord og i Oslo. Framtida.no har publisert over 2500 artiklar – noko som også er ny rekord. Sidan starten i september 2010 har Framtida.no publisert over 11000 artiklar.
Ifølgje Retriever er Framtida.no sitert eller omtalt i andre nyheitsmedium på nett og papir 373 gonger. Det er òg ny rekord.
– Dette viser at me lagar journalistikk som blir lagt merke til, seier ein nøgd redaktør Svein Olav B. Langåker.
Vellukka debattprosjekt
I løpet av året har Framtida.no vore med på å arrangera 12 debattar og debattkurs i samarbeid med dei åtte biblioteka i Sunnhordland og skular og ungdomsråd gjennom prosjektet Me snakkast.
Då Nasjonal bibliotekstrategi blei lagt fram i haust, var debattprosjektet eitt av tre prosjekt for ungdom som blei trekt fram som gode døme.
– Debattmodellen vår har no blitt ein modell som fleire ønskjer å kopiera. Etter valet fekk alle biblioteka i Hordaland kurs i korleis dei kan laga debattar i biblioteka, og me skal vera med på å arrangera fleire debattar i 2016, fortel Svein Olav B. Langåker.
Elles i 2016 skal Framtida.no satsa på spennande journalistikk for unge om forsking og få ny design på nettsidene.
