Eit stort fleirtal av fylkesutvalet i Møre og Romsdal går inn for å behalde fylket som eigen region.
Det endelege vedtaket skal fylkestinget gjere først i desember, men signalet frå fylkesutvalet er tydeleg: Med unntak av Nordmørslista var alle partia samde om at dei vil behalde fylket samla, med visse justeringar, skriv Sunnmørsposten.
Utvalet vedtok i si innstilling at ein ønskjer at Møre og Romsdal, med eventuelle grensejusteringar, held fram som eigen region frå 1. januar 2020. Samstundes vil fylkeskommunen ikkje stille seg i vegen for søknaden frå Rindal kommune om overføring til Trøndelag.
Når fylkestinget har teke si avgjerd 13. desember skal fylkespolitikarane gje si høyringsutsegn til Kommunal- og moderniseringsdepartementet. (©NPK)
