Norsk Målungdom deler ut Dialektprisen 2012 til TV-personlegdomen Harald Rønneberg.
– Harald Rønneberg har gjennom ei årrekkje vore ein stødig og positiv ambassadør for haldensmålet i det offentlege rommet, og eit godt språkleg føredøme for ungdom, seier Vebjørn Sture, leiar i Norsk Målungdom.
Hevar statusen
Dialektprisen blir delt ut éin gong i året, og går til offentlege personar som har utmerkt seg med god og genuin bruk av dialekt. Sture framhevar at Rønneberg bruker ein dialekt som ikkje så mange andre viser fram på TV.
– I Noreg har dialektar generelt høg status, men særleg på Austlandet blir enkelte dialektar sett meir ned på. Talemålet i hovudstaden har til dømes mykje høgare status enn dialektane i områda rundt. Østfoldingen Harald Rønnebergs konsekvente og sjølvsikre dialektbruk er med på å motverke denne ulikskapen, forklarer Sture, som overrekkjer prisen under Norsk Målungdoms haustkonferanse i Drammen no på laurdag.
Folkekjær prisvinnar
Harald Rønneberg (f. 1973) er frå Halden i Østfold, og har vore programleiar på TV2 i nærare ti år – fyrst i Idol, deretter for Senkveld. Rønneberg har tidlegare vunne fleire Gullruten-prisar, og er no den fyrste østfoldingen som blir tildelt Dialektprisen.
Prestisjetungt
Dialektprisen har blitt delt ut årleg sidan 2001. Prisen har opparbeidd seg status som ein av dei mest prestisjetunge språkprisane i Noreg – kanskje særleg fordi prisen blir vedteken gjennom ein demokratisk prosess av språkengasjerte ungdomar. Blant tidlegare prisvinnarar finn vi namn som Ravi, Ingrid Bolsø Berdal, Eli Kari Gjengedal og Lars Vaular.
