Maria Parr fekk i dag tildelt prisen som Årets nynorskbrukar.
Prisen på 50 000 kroner, eit trykk og eit diplom vart overrekt under opninga av Dei nynorske festspela i kveld. Parr har fått prisen for si evne til å skape klok og sterk litteratur.
Maria Parr har motatt ei rekkje prisar for dei to barnebøkene sine Vaffelhjarte og Tonje Glimmerdal. Vaffelhjarte er seld til omsetjing i seks land og kjem dessutan som tv-serie på NRK. Tonje Glimmerdal er også seld til fem land.
Maria Parr kunne i kveld fortelje at ho ikkje er ein slik forfattar som har plott og ramer klare når ho tek til å skrive. I staden skapar ho ein figur og let ting skje rundt denne. Tonje Glimmerdal starta eigentleg som ein gut, men Parr meinte etter kvart at det var meir rett å skrive om ei jente.
– Det er for få stolte, handlande jenter i barnelitteraturen, fortalde den 29 år gamle forfattaren i ein samtale med Audhild Gregoriusdotter Rotevatn etter prisutdelinga.
Parr har no eit nytt skriveprosjekt i tankane, men ho kan ikkje seie kva det vil bli anna enn at det blir for barn.
