Kjartan Fløgstad meiner nynorsken som riksspråk er trua. I ein kronikk i Aftenposten heidrar han den einaste nynorskeleven i Oslo,Medna Israilova.
– Det er litt skummelt å bli dratt fram òg. Det kjennast litt som eg er den einaste i heile Noreg som brukar nynorsk, seier Medna til Framtida om kronikken Fløgstad har dedisert til henne.
– Eg trur nokre kan få problem når dei blir eldre viss dei ikkje har hatt nynorsk, men samstundes tykkjer eg elevane må få velje sjølv, seier Medna som ikkje ser på seg sjølv som noko nynorskforkjempar, ho berre skriv nynorsk ho.
Fløgstad meiner nynorsken som riksspråk er i fare, trass i at nynorsk dikting “aldri har stått sterkare” og at nynorsken er både “breiare og høgare og lågare og spissare og har større vitalitet enn nokon gong”.
Fløgstad går også hardt ut mot eit intervju Aftenposten hadde med Medna Israilova.
– Ein kunne jo tenkt seg at denne modige jenta ville bli hylla redaksjonelt for sitt bidrag til mangfald og språkleg fridom. Kanskje til og med få ein ytringsfridomspris? Kva med institusjonen Fritt Ord? Men nei, slett ikkje og tvert imot. I staden blir innvandrarjenta hengt nådelaust ut. “Medelevene hater nynorsk”, slår Aften påpasseleg fast, utan kjeldetilvising. “Nynorsk er en pest og en plage,” er ei anna overskrift frå same tid, i same avis.
