Olje- og gassfunnet Draupne i den midtre delen av Nordsjøen har i dag fått namnet Ivar Aasen. Noko Ottar Grepstad gler seg over.
– Nynorsk er grunnfesta til det norske folkestyret og det moderne samfunnet. Vi gratulerer olje-og energiminister Ola Borten Moe med eit godt og symboltungt namneval, og det passar godt å plassere Johan Sverdrup og Ivar Aasen ved sida av kvarandre ute i Nordsjøen, seier direktør Ottar Grepstad i Nynorsk kultursentrum.
Olje-og energidepartementet varsla i petroleumsmeldinga ei endring av praksis for namnsetting av petroleumsfelt på norsk sokkel. Det vart også sett ned ei rådgjevande namnegruppe som består av Karsten Alnæs, Kristin Clemet, Per Egil Hegge og Mari Hauan.
– Namn på større sjølvstendige utbyggingar har ein signaleffekt utover sokkelen. I dette tilfellet er meininga at Ivar Aasen-funnet skal vitne og minne oss om at det norske folkestyret er tufta på språkleg mangfald, og at det språklege mangfaldet i norsk offentlegheit er eit kjennemerke ved demokratiet vårt gjennom lange tider, seier olje-og energiminister Ola Borten Moe i ei pressemelding.
Ivar Aasen-funnet ligg i den midtre delen av Nordsjøen, om lag 200 kilometer vest for Stavanger.
