Ein underskriftskampanje har fått nok stemmer til å krevje folkeavstemming om Hornindal kommune i Nordfjord skal høyre til Sogn og Fjordane eller Møre og Romsdal.
Det er nestleiaren i Sjukehusaksjonen i Nordfjord, Tanja Heggen, som har samla underskriftene, fortel Bergens Tidende. På få timar skal ho ha fått inn 90 underskrifter, noko som utgjer 2 prosent av innbyggjarane i kommunen. Det betyr ifølgje avisa at politikarane er pliktige til å ta stilling til forslaget.
Ifølgje NRK.no krev dei 90 innbyggjarane ei folkerøysting for å få bytt helseføretak og endra fylkesgrensa.
Ordførar i Hornindal, Anne-Brit Øen-Nygård, seier, ifølgje Bergens Tidende, at ho ser det som naturleg at folkerøystingane blir avvikla i samband med stortingsvalet neste haust.
Etter at Kvivsvegen no er opna får fleire kommunar i Nordfjord kortare reiseveg til tilbod på Sunnmøre. (NPK)
