I kveld byrjar landstinget til LNK. Det blir paneldebattar, prisutdeling, drypp frå kommune-Noreg, språklege fråspark og rikeleg med kultur.
Kulturkvelden i kveld blir ei god oppvarming til dei to fagdagane som følgjer i morgon og torsdag. Per Inge Torkelsen skal leie kulturkvelden i Voss kulturhus, og der får du også treffe Sigrid Moldestad, Twang Gang, Arne Anderdal og Olav Undeland.
Jan H. Landro skal leie debatten mellom kreftene frå media på onsdag, medan torsdagens paneldebatt vil handle om det norske språket etter Språkåret.
Landstinget får eller besøk av Helge Andre Njåstad (Frp), ordførar i Austevoll, som vart kåra til Årets kommuneprofil i Kommunal Rapport i vinter.
Det nye norskfaget blir sjølvsagt eit tema, og det er det førsteamanuensis ved Høgskolen i Sogn og Fjordane, Jan Olav Fretland, som vil ta for seg.
Teatersjef Terje Lyngstad ved Sogn og Fjordane teater kjem også. Lyngstad er fast spaltist her på LNK.no, og han vil snakke om nynorsk på teaterscena.
Som alltid blir det utdelt språkpris for god offentleg målbruk. Kven som får prisen får du vite på torsdag morgon, då Kari Traa kjem for å gje han til ein verdig vinnar.
Les også: Deler ut pris for god offentleg målbruk
I løpet av desse dagane skal LNK også ha årsmøte. Styreleiar Astrid Myran Aarvik gjer seg etter denne perioden, og ordførar i Ullensvang, Solfrid Borge, er innstilt som ny leiar.
Les også: Solfrid Borge innstilt som ny leiar i LNK
Du kan følgje landstinget til LNK her på LNK.no, på Facebook og på Twitter. I LNK-avisa som kjem neste veke blir det også fyldig dekning frå landstinget.
