Korleis står det til med helsetilstanden til innbyggjarane i kommunen der du bur? Ved hjelpa av eit par klikk på PC-en kan lokale styresmakter no få svar på dette spørsmålet.
Folkehelseinstituttet har oppretta folkehelseprofilar for alle kommunane i landet. Profilane inneheld opplysningar om befolkning og levekår, miljø, skule, levevanar, helse og sjukdom.
– Profilane skal gje kvar kommune dei store linjene, seier direktør Geir Stene-Larsen ved Folkehelseinstituttet.
Han håpar folkehelseprofilane kan hjelpa kommunane til å finna dei svara dei treng. Han seier at kommunane dessutan får tilgang til Kommunehelsa statistikkbank. Her kan kommunane gjera oppslag og fordjupa seg i spesielle problemstillingar. Statistikkbanen inneheld statistikk om helse, sjukdom, risikofaktorar og befolkning i norske kommunar. (NPK)
