Kommunar som er styrt av både høgre- og venstresida, seier nei til at staten skal ha vetorett mot lokale utbyggingar.
Dersom lovforslaget går gjennom, må fylkesmannen som er representant for staten i fylka, godkjenne alle kommunale vedtak om låneopptak og langsiktige leigeavtalar, skriv Klassekampen.
– Slike reglar strider mot prinsippet om kommunalt sjølvstyre og er eit unødig inngrep overfor kommunar i økonomisk balanse, skriv Høgre-styrte Stavanger kommune i sitt høyringssvar.
Til saman 27 kommunar har så langt sendt inn høyringssvar på forslaget til kommunalminister Jan Tore Sanner (H). Så langt er det berre Moss og Trondheim som støttar regjeringa. Resten av kommunane er samstemte i motstanden mot å innføre statleg godkjenning av kommunale låneopptak og leigeavtalar.
Forslaget er eit ledd i den komande kommunereforma til regjeringa. Formålet med forslaget er å «sikre at kommunane ikkje gjennomfører uheldige økonomiske disposisjonar og strategiske tilpassingar i forkant av kommunereforma».
Ifølgje avisa fryktar regjeringa at kommunar som ikkje ønskjer kommunesamanslåingar, vil kunne spolere moglege samanslåingar gjennom nybygg av alt frå skular til rådhus.
Kristeleg Folkeparti kan likevel sikre regjeringa fleirtal, skriv avisa. (©NPK)
