Krev meir nynorsk i barne-TV
Av Nynorsk Pressekontor (NPK) 22.nov.2007
KrF og Venstre vil ha meir nynorsk i barne-TV. Når den nye barnekanalen NRK Super går på lufta 1. desember, krev dei to partia at NRK oppfyller regelen om 25 prosent nynorsk.
Det kan ikkje programsjef Kalle Fürst lova.
– Det er faktisk veldig vanskeleg å få folk som snakkar reint nynorsk. Difor leitar vi først og fremst etter personar med dialekt, seier han til Vårt Land.
– Dette held ikkje, seier KrF-politikar May-Helen Molvær Grimstad til avisa. Ho meiner påverknaden frå fjernsyn i barndommen er avgjerande for om ein held fast på nynorsken seinare i livet. (©NPK)
