Kort tid før fristen for å søke om kommunesamanslåingar går ut, har kommunalminister Jan Tore Sanner (H) hatt eit forslag om endra inntektssystem ute på høyring.
Forslaget er kontroversielt og blir av fleire sett på som eit tvangsmiddel for å få fleire kommunar til å slå seg saman. No seier også Kristeleg Folkeparti klart frå at dette ikkje er noko dei vil vere med på.
– Regjeringa bør trekkje forslaget tilbake, seier partileiar Knut Arild Hareide til Nationen. I forslaget blir det skilt mellom «frivillige» og «ufrivillige» små kommunar, der dei som blir rekna som frivillig små blir straffa for å bli ståande åleine.
Partiet vedtok onsdag å seie nei til å gå inn i forhandlingar med regjeringa om stortingsmeldinga.
– Det er fordi vi meiner det ikkje er rett å komme med eit nytt inntektssystem no, så kort tid før fristen i ei viktig reform, seier Hareide. Han er samd med kritikarane som har omtalt inntektssystemet som eit tvangsmiddel for å få fleire kommunar til å slå seg saman. Oppfordringa hans til Jan Tore Sanner er klar: Trekk forslaget om endra inntektssystem.
– Eg meiner at vi ikkje bør få eit heilt nytt inntektssystem no, iallfall ikkje eit som påverkar prosessane i kommunane. Det kan vere behov for mindre justeringar, men det som blir lagt fram no er ikkje ei mindre justering, seier Hareide. (©NPK)
