Aud Søyland har fått kulturprisen frå Nord-Aurdal kommune. Ho får prisen for å ha vore aktiv i kulturarbeidet i Valdres på fleire felt.
– Det er viktig for meg å seie at frivillig arbeid gir veldig mykje tilbake. Det er ikkje slik at ein driv med dette for å få ros. Eg har personleg glede av det. Eg har blitt kjent med masse kjekke folk, og ikkje minst har eg lært utruleg mykje i organisasjonslivet, seier Aud Søyland, til avisa Valdres.
Ho har vore aktiv i SV i Nord-Aurdal og Valdres Folkemusikklag. Ho var ein av initiativtakarane bak Leira grendelag, Internasjonalt kvinneforum og Valdres bokdag. Ho har drive barneleikarring på Leira i mange år, vore med i kulturstyre, oppvekstutval, kommunestyre og formannskap, har vore styremedlem i Valdresmusea, og er nå leiar i Vennelaget for Valdres Folkemuseum og Valdres mållag.
Ho er også tidlegare mangeårig styremedlem og nestleiar i Noregs Mållag.
