750.000 veljarar er framleis i tvil om kva for eit parti dei skal stemme på under stortingsvalet måndag, viser ei fersk undersøking.
Ein av fire veljarar veit dermed ennå ikkje sikkert kven dei skal stemme på, ifølgje Norstats meiningsmåling for NRK.
At så mange ennå ikkje har bestemt seg er ein ny trend. Før var det tidleg meir opplagt kven som ville få stemma di, seier valforskar Rune Karlsen ved Universitetet i Oslo.
– Det var sterk samanheng mellom kven du var og kva du stemte på. Arbeidarar stemte på Arbeidarpartiet, folk i embetsverket stemte på Høgre og bønder på Bondepartiet (seinare Senterpartiet). Men dei store endringane i samfunnet har gjort koplinga mellom parti og veljarar svakare, seier valforskaren.
Han seier dei som ikkje har bestemt seg ennå i snitt er litt yngre enn dei som bestemmer seg før valkampen startar. Han understrekar likevel at det for dei aller fleste «siste liten-veljarane» står mellom to eller tre parti. Valkampen bruker dei til å få informasjon om alternativa og bestemme seg.
Valundersøkingane ved dei siste vala har vist at så mange som 11 prosent av veljarane ventar heilt til valdagen med å bestemme seg for kva for eit parti dei skal gå for. Det betyr at i underkant av 300.000 veljarar først hoppar ned frå gjerdet når dei går inn i stemmeavlukket. (©NPK)
