Norske legar vil ikkje jobbe i distrikta. Legemangelen i Sogn og Fjordane er no så alvorleg at fylkeslegen slår alarm.
– Då eg kom til Sogn og Fjordane for mange år sidan var det om lag 10.000 legar i Noreg og det var vanskeleg å få legar til distrikta. No er det blitt over 20.000 legar, men framleis er det vanskeleg, seier fylkeslege i Sogn og Fjordane Per Stensland til NRK.
Stensland meiner at folk i distrikta ikkje bør finne seg i så dårleg legedekning. No fryktar han at skeivfordelinga av legar mellom distrikt og sentrale strok vil bli endå meir urimeleg om ikkje noko vert gjort.
– Både kommunane og fylket har ein ugjort jobb. Men vi må også krevje at sentrale styresmakter legg meir til rette for at legetenesta i distrikta skal bli meir stabil og meir føreseieleg, seier Stensland.
Fylkeslegen meiner situasjonen kan bli forverra når samhandlingsreforma trer i kraft frå 1. januar neste, då den vil gi eit auka behov for legar ute i distrikta. Samtidig kan det gå mot at turnustenesta vert avvikla, noko som kan gjere det endå meir vanskeleg å freiste unge legar til å jobbe i distrikta. (NPK)
