Frå januar 2012 kan alle dei politiske utvala i Volda kommune bli papirlause. Det vil i følgje administrasjonen gi ei innsparing på rundt 50.000 kroner i året.
Dei politiske utvala vil på oppmoding frå politikarane redusere både kostnader og miljøkonsekvensar ved å kjøpe inn nettbrett til alle medlemene. Administrasjonen har rekna ut at dersom alle utvala går over til digitale løysingar, kan ein spare opptil 50.000 kroner kvart år på porto, kopipapir og vedlikehald av kopimaskinar. I tillegg vil miljøet vere tent med eit lågare papirforbruk, skriv Nærnett, lokale nyhende frå journalistutdanninga i Volda, på sine nettsider.
Slike nettbrett kan frå januar neste år vere fast inventar i kommunen sine utvalsmøte.
Andre kommunar i Møre og Romsdal har allereie tatt i bruk pc’ar og nettbrett, mellom anna Vestnes i 2008 og Ørskog tidlegare i år. Deira erfaringar er, i følgje Volda kommune sine dokument, positive.
I skrivet frå administrasjonssjef Jarle Krumsvik heiter det at ordninga kan innførast i dei fire store utvala: Formannskapet, driftsstyret, forvaltningsstyret og kommunestyret. Dei nye løysningane vil bli finansiert med eit låneopptak.
Før den nye ordninga blir innført, må kommunen avgjere om dei skal satse på pc eller lesebrett.
Dei politikarane som nektar å ta i bruk dei elektroniske alternativa på utvalsmøta kan, med ordføreren si velsigning, hente papirutgåvene av utvalsdokumenta på kommunen sitt servicekontor. Dokument som er unnatekne offentlegheit vil framleis bli sende ut i papirversjon for å ivareta sikkerheita.
