Framtida.no har fått såkalla responsiv design.
Denne veka fyller Framtida.no fire år. Fireårsdagen blir feira med at nettavisa får mobiltilpassa bladbunad. Ved hjelp av såkalla responsiv design skal innhaldet no tilpassa seg skjermstorleiken til lesarane. Dermed blir det slutt på at ein må zooma seg inn på teksten når ein er på mobil.
– Eg håpar dette vil gjera at endå fleire vil bruka Framtida.no, seier Svein Olav Langåker, redaktør i Framtida.no.
Så langt i år har over 215.000 brukarar vore innom Framtida.no, ein auke på 23 prosent frå same periode i fjor. I august hadde Framtida.no over 40.000 unike brukarar, ein auke på over 30 prosent samanlikna med august i fjor.
Landssamanslutninga av nynorskkommunar driv nyhende- og debattavisa for unge i samarbeid med ABC Startsiden.
