Kommunal- og moderniseringsdepartementet lyser no ut arbeidet med å greia ut eit regionalt folkevalt nivå som del av kommunereforma.
– Då kommunereforma blei behandla i Stortinget i juni, bad Stortinget samstundes regjeringa om å gå gjennom oppgåvene til eit regionalt nivå. Departementet lyser no ut dette oppdraget, seier kommunal- og moderniseringsminister Jan Tore Sanner.
Oppdraget går ut på å samanlikna og vurdera eksisterande utgreiingar, slik at regjeringa og stortinget får eit godt fagleg grunnlag til å ta ei avgjerd.
Representantar frå fylkeskommunen skal vera med i ei referansegruppe for utgreiinga.
– Utgreiinga av eit regionalt nivå skal skje parallelt med arbeidet med ei stortingsmelding om nye oppgåve til større og meir robuste kommunar, seier Sanner.
Fristen for å koma med tilbod er 20. august. Dei som får oppdraget må levera sluttrapporten 17. november. (©NPK)
