Mange av søknadskjemaene hjå NAV er berre tilgjengelege på bokmål. No vert det lova ei endring.
Dersom du til dømes skal søkje NAV om foreldrepengar, får du tilgang til ein del nynorsk informasjon fram til sjølve søknadskjemaet. Men då er det slutt, dette skjemaet er nemleg berre tilgjengeleg på bokmål.
– NAV har som mål at alle skjema som ligg ute på nav.no, til ei kvar tid skal vere tilgjengelege på båe målformer, seier seksjonssjef i NAV, Espen Sunde.
Likevel har ikkje nynorskbrukarar i dag tilbod om søknadskjema på nynorsk. Sunde forklarer dette med at NAV er i ei omstilling.
– På grunn av ny skjemaløysing må mange skjema byggast om. Dette arbeidet er ikkje fullført, men nynorskversjonar av skjema vil bli lagde ut etter kvart som dette arbeidet blir ferdig, slår han fast.
Mange av sidene og artiklane på nav.no er også berre tilgjengelege på bokmål.
