Linda Eide fekk årets Melsompris for boka Oppdrag mottro – jakta på gamle dagar.
Prisen er på 40 000 og vert delt ut av Litteraturselskapet Det Norske Samlaget. I juryen sat Ola E. Bø, Hilde Sandvik og Brit Bildøen, som meinte at «boka (er) eit morosamt og opplysande tidsbilde, med eit vake blikk for sosiale nyansar.» Prisen vart delt ut under opninga av Litteratursymposiet i Odda.
Melsomprisen er basert på skipsreiar Ferd. Melsoms legat som vart stifta i 1922.Statuttane for Melsomprisen seier at prisen skal delast ut til ei bok som «efter sitt innhold kan egne sig til folkelæsning og masseutbredelse». Tidlegare vinnarar av prisen er m.a. Frode Grytten, Maria Parr, Jon Fosse og Lars Amund Vaage.
Tidlegare i år fekk Eide Målprisen 2013 av Noregs Mållag. Onsdag 16. oktober vitjar ho Litteraturhuset i Oslo, mellom anna saman med Valkyrien Allstars.
– Melsomprisen går i år til ei bok som fell mellom fleire sjangrar. Eller som skaper ein ny sjanger: «telefonintervju med dine nærmaste». I fleire år tasta Linda Eide mor si for å få stoff til å fylle spalta si i Bergens Tidende. Innleiingsspørsmålet kunne vere: Du, når kom 8. mars eigentleg? Kva har Elvis betydd for deg? Var det vanleg med straumsjokk før?, skriv juryen.
