Det digitale oppslagsverket Allkunne, presenterer for første gong i Noreg ein komplett serie med biografiar over norske statsministrar på nynorsk.
Biografiane er skrivne av politiske redaktør i Sunnmørsposten, Harald Kjølås, og prosjektet har kome til gjennom eit samarbeid med Samlaget og Statsministerens kontor, fortel Allkunne i ei pressemelding.
– Dette er eit viktig demokratisk prosjekt. Å kome tettare inn på norske regjeringssjefar gir ny kunnskap om Noreg som nasjon. Vi får innblikk i både skjebnar, konfliktar og politisk spel, og vi vert kjende med mennesket bak tittelen, seier dagleg leiar i Allkunne, Audhild Gregoriusdotter Rotevatn.
Bileta som er knytt til artiklane, har tidlegare aldri vore vist for eit allment publikum. Bileta hang i Høgblokka fram til 22.juli, og er no digitaliserte og flytta. Allkunne er dei første som publiserer bileta digitalt. Audhild Gregoriusdotter Rotevatn seier ho er svært glad for samarbeidet med Statsministerens kontor.
Allkunne er eit nynorsk nettleksikon som opna i 2009.
