Tettstaden Nordfjordeid i Sogn og Fjordane er komen med på den nasjonale lista over byar og tettstader med kulturmiljø av nasjonal interesse.
Ifølgje Riksantikvaren omfattar databasen NB!registeret 75 bymiljø i Noreg. Riksantikvar Jørn Holme kjem sjølv til Eid kommune fredag 25. juli for å markere at Nordfjordeid blir tatt inn på den nasjonale lista, fortel Fjordenes Tidende.
– Nordfjordeid i Eid kommune i Sogn og Fjordane er ein tettstad med ei uvanleg rik kulturhistorie, der du enno i dag kan følgje historia sine spor i Noreg frå vikingtida heilt fram til i dag på ein og same stad, heiter det mellom anna i skildringa Riksantikvaren har gitt av staden.
Det er tre ulike tettstadmiljø i Nordfjordeid som no samtidig hamnar i registeret. Frå før er Sogn og Fjordane representert med Gamle Lærdalsøyri, Høyanger sentrum og Strandgata i Florø.
NB!registeret skal angi område der det må visast særlege omsyn i samband med vidare forvalting og utvikling, men å stå i lista inneber ikkje formelt vern av eit kulturmiljø, ifølgje Riksantikvaren. (©NPK)
