Tysdag ho er mild og fin. Blyg som snøklokka om våren … Onsdag, derimot, er ein virvelvind. Slik går dagane i den nye songen om vekedagane som Nynorsksenteret har fått laga.
Vekedagane er altså ein splitter ny barnesong, på nynorsk. Den har kome til som eit resultat av Nynorsksenteret sitt ønskje om at det skal finnast fleire brukssongar for barn på nynorsk.
Men eigentleg byrja songen som eit dikt, fortel Arild Torvund Olsen ved Nynorsksenteret.
– Me kontakta Hilde Myklebust, som er lyrikar og har skrive bøker for både vaksne og born, for å høyre om ho kunne skriva eit dikt om vekedagane. Resultatet vart så fint at me fann ut at me ville gjere meir med teksten, seier Olsen.
Animatøren Martine Grande fekk i oppdrag å lage illustrasjonar til teksten. Ho har tidlegare laga filmen om Jakob og Neikob. Heidi Marie Vestrheim, musikar og programleiar i NRK Super, har sett tonar til Vekedagane. No er det berre for små og store å ta songen i bruk.
– På heimesidene til Nynorsksenteret kan folk sjå ein illustrert musikkvideo til songen, laste ned innspelinga til Heidi Marie Vestrheim, skrive ut illustrerte ark for kvar vekedag eller skrive ut songteksten med gitargrep. Og alt er gratis, seier Arild Torvund Olsen.
