Finn Totland blei i mars konstituert som forlagsredaktør for litteratur i Samlaget. No trekkjer han seg frå stillinga.
– Det er eit overraskande val, ikkje minst fordi Totland blir rekna som favoritt til den faste stillinga som forlagssjef for litteratur, seier Dag H. Nestegard, redaktør for fagbladet Bok og Samfunn til Klassekampen.
Totland sjølv kallar valet udramatisk og seier han har teke avgjerda sjølv fordi han ønskjer å gå tilbake til jobben sin som forlagsredaktør for omsett skjønnlitteratur.
Anne Liv Tresselt er konstituert som ny forlagssjef for litteratur. Ho kjem frå stillinga som sals- og marknadssjef.
Det har det siste halve året vore fleire utskiftingar i leiinga i Det Norske Samlaget. I februar slutta forlagsdirektør Tove Lie på dagen, og i april gjekk forlagsredaktør for litteratur Margit Walsø til stillinga som ny direktør i Norla – senter for norsk skjønn- og faglitteratur i utlandet.
I juni blei Edmund Austigard tilsett som ny direktør i forlaget. Han har framleis ikkje teke til i stillinga. (©NPK)
