Håvard B. Øvregård har sagt ja til attval som leiar i Noregs Mållag. Inn i styret kjem også nye krefter, deriblant Helga Hjetland.
Håvard B. Øvregård er 34 år, bur i Oslo, og kjem frå Bjørkedal i Volda. Øvregård har no takka ja til attval som leiar i Norges Mållag.
– Eg vil prioritere å få fram forsking på målbyte frå nynorsk til bokmål i skulen, seier han i ei pressemelding.
Av nye namn i styret kan ein nemne tidlegare leiar i Utdanningsforbundet, Helga Hjetland, som har sagt ja til å vere styrekandidat.
– Eg har vore medlem i Mållaget heile livet, men det er fyrst no eg endeleg har tid til å engasjere meg. Eg har arbeidd mykje med barn og unge i skulen og ser kor viktig det er å gjere både dei unge, og dei vaksne i skulen medvitne og stolte av språket sitt, seier Hjetland og legg vekt på at ho i Utdanningsforbundet har arbeidd mykje med retten til morsmålsundervisning, og at dette er viktig for målsaka
Jens Kihl stiller til nestleiarvervet. Med sine 24 år er han ein av dei yngste nestleiarane i Mållaget nokon gong. Jens Kihl er tidlegare leiar i Norsk Målungdom og kjem frå Oslo. Det nye styret vert valt på landsmøtet i Noregs Mållag på Stiklestad helga 16. – 18. april 2010.
