Vestlandsrådet har fått ny leiar og ny sekretariatsleiar. Tom-Christer Nilsen, fylkesordførar i Hordaland, er blitt leiar av rådet. Odd Erik Hansgaard er tilsett som ny sekretariatsleiar.
Fylkesordførar Tom-Christer Nilsen i Hordaland tok over leiarfunksjonen i Vestlandsrådet etter nyttår. Han tok over etter fylkesordførar Janne Johnsen i Rogaland.
Leiarvervet i Vestlandsrådet går på rundgang mellom dei fire fylkeskommunane som er medlem av Vestlandsrådet. I 2013 tek Sogn og Fjordane over leiarvervet.
Odd Erik Hansgaard blir ny sekretariatsleiar for Vestlandsrådet etter Trond Ueland, som gjekk av ved årsskiftet. Hansgaard tiltrer i stillinga 1. februar. Kontorstad vil vere Stavanger.
Sekretariatsleiaren er dagleg leiar for sekretariatet for Vestlandsrådet, og skal førebu og følgje opp saker for Vestlandsrådet.
Vestlandsrådet er eit formelt samarbeidsråd på Vestlandet oppretta av fylkeskommunane Rogaland, Hordaland, Sogn og Fjordane og Møre og Romsdal. Vestlandsrådet skal mellom anna styrke landsdelen både nasjonalt og internasjonalt, koordinere den politiske innsatsen til beste for landsdelen innanfor definerte satsingsområde og fremje andre politiske saker av felles interesse. (©NPK)
