Regjeringa vil frita Posten frå krav om nynorsk, men Posten sjølv er nøgd med reglane slik dei er.
Samferdsledepartementet la i vår fram stortingsmeldinga «Postsektoren i endring», der dei mellom anna ville frita Posten frå å følgja mållova fordi det kunne vera ei ulempe i møte med konkurrentane.
Under ei høyring med transportkomiteen på Stortinget kom det fram at målkravet ikkje var ei ulempe for Posten. Dei seier det er eit politisk spørsmål, og at dei lever godt med kravet slik det er.
Posten synest òg det er ein fin tradisjon at det står Noreg på 25 prosent av frimerka.
– Nynorsk er inga vesentleg utgift for oss. Me har ikkje rekna på kostnadane, og lever godt med dei gjeldande krava, sa konsernsjef i Posten Noreg AS, Tone Wille.
Det er Magne Aasbrenn, leiar i Noregs Mållag, glad for å høyra. Han meiner dette syner at nynorsk ikkje er noka hindring. (©NPK)
LES OGSÅ: Sterke reaksjonar mot Vestlandsregion utan nynorsk
