Rett før barnehageåret tok til i haust dumpa det 7 kilo med statlege informasjonsbrev i posten til nynorskkommunen Ørsta. Samtlege brosjyrar var på bokmål.
Informasjonbrevet Velkommen til barnehagen blir sendt ut frå Kunnskapsdepartementet til alle kommunar i landet slik at dei kan delast ut til foreldra ved starten av nytt barnehageår.
– Bak på brosjyren står det at den også finst på andre urdu, arabisk, samisk og andre språk, men ikkje eit ord om at han finst på nynorsk, seier Borgny Ottestad Knarvik som er rådgjevar for barnehagane i Ørsta kommune. – Eg ringde då til departementet og spurde om det ikkje var meininga at vi skulle få den på nynorsk.
Hjå departementet kunne dei informere om at nynorskutgåva var under utarbeiding, men at den dessverre var noko forseinka. Og riktig nok, to veker seinare kom alle nynorskbrosjyrane til Ørsta. Då var barnehageåret allereie i gong.
Borgny Ottestad Knarvik reagerer først og fremst på det ho opplever som eit forsøk på å lure nynorskkommunane til å bruke informasjon på bokmål.
– Hadde eg ikkje ringt til departementet og spurd etter nynorskutgåva, ville eg ikkje vist at ho fanst ein gong. Då hadde vi truleg berre distribuert bokmålsversjonen som kom først.
I Ørsta kommune er alle barnehagane opptekne av å bruke nynorsk, og kommunen samarbeider med Ørsta mållag om å få enno meir fokus på nynorsk i barnehagen.
– Vi tar dette alvorleg og er nok litt over middels intersserte i språket, seier rådgjevaren.
Samstundes er ho og oppgitt over miljøperspektivet i denne saka. Slik stoda no er sit Ørsta kommune, og truleg andre nynorskkommunar, med dobbelt opp med materiell. Sjølv om det berre er snakk om eit enkelt A4-ark til kvar forelder, så utgjer det for Ørsta sin del 7 kilo for kvar målform. Når barnehagestyrarane sette ut dei to kassene med brosjyrar til feorldra, så forsvann nynorskbrosjyrane, men ikkje dei andre.
– Dette er veldig sløvt av departementet, seier Ottestad Knarvik. – Og litt komisk blir det når departementet avsluttar e-postkommunikasjonen sin med ei opmoding om å ikkje skrive ut denne e-posten for å spare miljøet.
