Den norske artisten Espen Lind har fått i oppdrag å setje nye melodiar til gamle salmar. Han meiner salmetekstane på nynorsk er meir poetiske.
Nestor i norsk musikkbransje, Bjørn Nesjø, hadde ideen til prosjektet som har fått namnet ”Frå Billboardlista til salmeboka”. Espen Lind tar utgangspunkt i Landstad si salmebok, og han plukkar salmar heifrå som han komponerer nye melodiar til. Resultatet skal urframførast under Olavsfestdagene i Trondheim si sommar.
– Eg synest dette var eit spennande prosjekt. Å setje ny musikk til gamle salmetekstar er nok ikkje det folk tenkjer først på når dei tenkjer på meg, men eg synest det er kjekt å gjere nye ting, slår artisten fast.
Espen Lind (40) frå Tromsø har i tillegg til karrieren som artist, også vore låtskrivar og produsent i fleire år. Han har gitt ut fem soloalbum og vunne fem Spellemannprisar, fortel Wikipedia. Han har også hatt stor internasjonal suksess.
– Vi har ikke tenkt på ein raud tråd eller eit tema. I utgangspunktet har eg ikkje noko sterkare kjensler for salmar enn nordmenn flest, men når eg nå les tekstane er det mange eg stoppar ved. Tekstar som gir ei kjensle av rytme når eg les dei får ekstra merksemd. Generelt sett kan eg seie at tekstane på nynorsk appellerer meir enn dei på bokmål. Nynorsk har ein mer poetisk valør, seier artisten til NTB.
– Salmeprosjektet er eit ikkje-kommersielt formål med eit heilt anna nedslagsfelt enn det eg tenkjer på til vanleg, og det er ein kvalitet i seg sjølv. Her ønskjer eg først og fremst å vere komponist, seier Lind vidare.
Han har mellom anna invitert med seg folkemusikksongaren Ingebjørg Bratland til å syngje tekstane. Urframføringa skjer i Vår Frue Kirke torsdag 29. juli.
