Leiaren i Rogaland mållag, Magne Wiggo Høyland, fryktar at fleire bedrifter vel vekk nynorsk fordi ord på denne målforma gir færre treff i søkemotorar på internett, skriv nrk.no.
Høyland etterlyser fleire bedrifter som nyttar nynorsk. Etter søk på nett fann han ikkje ein einaste trafikkskule i nynorskkommunen Time på Jæren, medan søket gav fleire treff på trafikkskole. Høyland meiner mangelen på bedrifter som nyttar nynorsk heng saman med gamle fordommar om at det ikkje er seriøst nok å kalla det skule.
Trass i at ein på Jæren seier skule, heiter det skole på nett. Ved Googlesøk på trafikkskole får ein 829.000 treff, men byter du ut o`en med ein u får du berre 58.100 treff.
Identitet
Jærkokken, Heine Grov, nyttar derimot nynorsk bevisst i si marknadsføring. Han seier til nrk.no at han ikkje skjønar kvifor fleire lokale bedrifter ikkje nyttar nynorsk i si marknadsføring. Ifølgje Grov handlar det om identitet.
Mållagsleiaren vonar fleire vil følgja eksempelet til Jærkokken og meiner bedrifter vil tena på å nytta nynorsk i marknadsføring.
