Auditoriet på Nasjonalbiblioteket i Oslo var måndag fylt av folk med sterke meiningar om den nye nynorske rettskrivingsnorma.
Språkrådet stod bak det opne høyringsmøtet om framlegget til ei ny nynorsk rettskriving. Bakgrunnen for framlegget er Språkrådet sitt arbeid med å revidere nynorskrettskrivinga, eit resultat av stortingsmeldinga «Mål og meining. Ein heilskapleg norsk språkpolitikk» frå 2007–2008.
Frå talarstolen kom det innlegg frå mellom anna Noregs Mållag, Høgnorskringen, Nynorsk kultursentrum og Det Norske Samlaget, i tillegg til ei rekkje andre organisasjonar og enkeltpersonar.
– Språket vil uansett vere større enn norma, konkluderte leiar i rettskrivingsnemnda Grete Riise med då ho oppsummerte ordskiftet.
Målet med den nye nynorske rettskrivingsnorma er å etablere ei norm som skal gjere det lettare å vere nynorskbrukar, som er tydeleg for alle som bruker nynorsk som sidemål, og som er stabil over tid, heiter det i høyringspapira.
Høyringsfristen for framlegget til den nye rettskrivinga er fredag 25. februar, og innan 1. april skal nemnda levere eit endeleg forslag til styret i Språkrådet. Målet er å ta den nye rettskrivingsnorma i bruk frå 1. august 2012. (©NPK)
