Leiar for Nynorsk mediesenter, Magni Øvrebotten, er glad for at Førde er blitt eit sentrum for opplæring i nynorsk journalistikk.
–19. august 2013 var ein historisk dag for oss som er opptekne av nynorsk i media. Desse to små opplæringssentra i Førde tek den jobben norsk journalistutdanning ikkje bryr seg med, nemleg å lære opp nynorskbrukande journalistar, seier Magni Øvrebotten til Sogn Avis.
NRK har drive Nynorsk mediesenter sidan 2004. I haust starta Firda opp Nynorsk avissenter i den vesle sunnfordbyen. Til saman skal desse to læra opp ni nynorskpraktikantar til journalistar i løpet av det komande halvåret. I Firda tok dei denne veka mot det fyrste kullet, medan det var det nittande som gjekk inn dørene til NRK Sogn og Fjordane.
– Røynsla vår er at nynorskpraktikantane raskt vert ein del av redaksjonsmiljøet i NRK. Det kjem sikkert til å bli slik i Firda også, men no får dei fem nynorskpraktikantane våre fire likesinna som driv på med det same i Firda. Det trur eg blir kjekt og inspirerande for alle, seier Magni Øvrebotten.
