UiB-forskar Johanna Barddal får 11 millionar kroner frå Det europeiske forskingsrådet for å undersøkje historia til dei indoeuropeiske språka.
Det europeiske forskingsrådet (ERC) deler ut fleire typar stipend. Blant desse er ERC starting grants, som skal stø kommande forskingsleiarar som har potensial til å skape framifrå forskingsteam i Europa.
Johanna Barddal er forskar på Institutt for lingvistiske, litterære og estetiske fag ved Universitetet i Bergen (UiB). Ho fekk nyleg beskjed om at ho får eit ERC starting grant på 1,5 millionar euro (rundt 11 millionar kroner) for språkforskinga si, skriv UiB i ei pressemelding.
Barddal forskar på korleis kasus og argumentstruktur har utvikla seg i den indoeuropeiske språkfamilien.
– Med finansieringa frå ERC blir det faktisk muleg å gjennomføre ei undersøking på alle dei elleve indoeuropeiske greinene av språket. Utan denne støtta måtte vi nøgd oss med seks greiner, seier Barddal.
Ho begynte arbeidet sitt på det islandske språket, og utvida deretter til alle germanske språk. No ser ho på utviklinga i heile den indoeuropeiske språkfamilien.
– Dei eldre indoeuropeiske språka er ikkje alle like gamle, så med komparativ forsking bør det vere muleg å vise historiske banar, og den eventuelle evolusjonen til strukturane vi arbeider med, seier ho. (NPK)
