Artisten Stein Torleif Bjella har fått «Pris for god offentleg målbruk».
Prisen blei delt ut av Landssamanslutninga av nynorskkommunar under organisasjonen sitt Landsting på Gol i Hallingdal i dag, fredag.
Juryen si grunngjeving:
«Årets prisvinnar er ein original ordkunstnar. Ein person som på ein særmerkt og svært personleg måte viser korleis det nynorske språket kan brukast til å skapa fleirtydige tekstar. Underfundige tekstar som ofte tek utgangspunkt i kvardagslege situasjonar. Dei har gjerne ein humoristisk tone på overflata, men som regel rommar dei så mykje, mykje meir.
Prisvinnaren viser på ein overtydande måte kor nær hans eigen dialekt heng saman med skriftspråket nynorsk, og han brukar denne samanhengen til å skapa språklege nyvinningar. Kritikarar har hveda at tekstane hans er på same nivå som Kjell Askildsen og Tor Jonsson sine tekstar. Andre har samanlikna han med Alf Prøysen og Tom Waits.
Publikum og kritikarar vart for alvor kjend med Stein Torleif Bjella i 2009. Alt han har gitt ut etter den tid, alle dei småskakke sogene hans, heng på ein merkeleg måte saman. Han har skapt sitt eige rom både som tekstforfattar og musikar.»
Prisen er eit litografi av Ludvig Eikaas, med motiv frå Aasten-tunet i Hovdebygda, og 50 000 kroner. Den vart delt ut av Finn Tokvam.
Pris for god offentleg målbruk har, gjennom dei siste 20 åra, meir og meir blitt ein pris for bruk av god nynorsk i det offentlege rom.
