Bente Riise, redaktør for tidsskriftet Syn og Segn, er tildelt Nynorsk redaktørpris for 2011.
– Riise gjer eit framifrå arbeid for tidsskriftet og for nynorsk mediespråk. Det betyr mykje at tradisjonsrike publikasjonar som Syn og Segn når stadig vidare ut og rekrutterer nye skribentar, seier leiar for Mediemållaget, Berit Rekve i ei pressemelding.
I grunngjevinga legg juryen vekt på at Riise har gjort ein stor og viktig innsats for nynorsk som mediespråk gjennom sitt redaktørvirke for Syn og Segn. Ho har modernisert og popularisert det gamle og ærverdige tidsskriftet. Gjennom dette arbeidet har ho klart å gjere tidsskriftet til ein interessant arena også for journalistar, forfattarar, forskarar og andre skribentar som ikkje i utgangspunktet trur dei kan eller vil skriva nynorsk.
I perioden Bente Riise har vore redaktør for Syn og Segn har tidsskriftet blitt kåra til Årets tidsskrift i Noreg og Årets tidsskrift i Norden.
Bente Riise (49) har omfattande og variert journalistisk praksis og lang røynsle som redaktør. Ho er òg sakprosaredaktør i Samlaget. Ho vart kåra til Årets frilansar for arbeidet med boka Mor Russlands døtre i 1992.
