Det må ei lovendring til for å få brannsløkkjingsanlegg i dei fleste kyrkjer, meiner Riksantikvaren. I dag har berre éi av ti kyrkjer slike anlegg.
– Regelverket er ikkje godt nok. I dag er det ikkje lov å påleggje sløkkjingsanlegg i gamle kyrkjer. Den moglegheita burde ein hatt, seier seksjonssjef Harald Ibenholt hjå Riksantikvaren til Vårt Land.
– Dette er historiske bygningar med stor kulturminneverdi, også for dei neste generasjonane. Dei har dessutan mykje å seie for lokalsamfunna i dag. Her blir dei store hendingane i livet markert, seier han.
I rapporten «Kirkekontroll 2013-2014» som blir presentert denne veka, seier Kirkelig arbeidsgivar- og interesseorganisasjon (KA) at 70– 80 prosent av dei 1.625 kyrkjene her i landet bør få automatisk brannsløkkjingsanlegg. Ifølgje rapporten har berre 32 nye kyrkjer fått slikt anlegg dei siste fire åra. Dersom det tempoet fortset, vil ikkje målet vere nådd før om 130 år.
– Eit automatisk sløkkjeanlegg har alt å seie ved tilløp til brann, seier Oddbjørn Sørmoen i KA. (©NPK)
